ہائیکورٹ میں حضرت بی بی پاکدامنؒ کے مزار اور قبرستان کی تزئین آرائش کے متعلق متفرق درخواست پر سماعت ہوئی،عدالت نے بی بی پاکدامنؒ کے مزار اور قبرستان کی تعمیر روک دی، عدالت نے تعمیراتی کام کا جائزہ لینے کیلئے 4 رکنی کمیٹی تشکیل دیدی، کمیٹی میں درخواست گزار وکیل، وفاقی حکومت، پنجاب حکومت اور اوقاف کے وکیل شامل، عدالت نے کمیٹی کو دربار کا دورہ کرکے تعمیراتی کام کے حوالے سے کل رپورٹ پیش کرنے کی ہدایت کر دی۔ چیف جسٹس محمد امیر بھٹی نے متفرق درخواست پر سماعت کی۔
درخواست گزار کی جانب سے خواجہ حارث ایڈووکیٹ نے دلائل میں دربار کی
تعمیر کیلئے بنائی گئی کمیٹی کے دائرہ اختیار پر اعتراض کیا اور موقف اختیارکیا کہ
عدالت محض تحفظات پر درخواستیں خارج نہیں کر سکتی، پنجاب اسمبلی نے دربار کی تزئین
و توسیع کی قرار داد بھی منظور کی تھی۔ وفاقی حکومت کی منظوری کے باوجود حکومتِ
پنجاب نے ترقیاتی فنڈز جاری نہیں کئے اور مزار کی کچھ اراضی پر قبضہ کیا گیا ہے۔
محکمہ اوقاف کے وکیل نے کہا کتنی اراضی پر قبضہ ہے حکومت پنجاب بتا دے؟، استدعا ہے
کہ عدالت لوکل کمیشن کا تقرر کرے۔
چیف جسٹس نے اوقاف کے وکیل سے مکالمہ کرتے ہوئے کہا لوکل کمیشن
کے تقرر کی ضرورت نہیں۔ درخواست گزار وکیل نے کہا عدالت پہلے میری درخواست میں
اٹھائے گئے اعتراضات دیکھے، عدالت دیکھے آیا کمیٹی کی سفارشات کی روشنی میں دربار
کی تزئین و آرائش وتوسیع درست ہے۔ چیف سیکرٹری اور سیکرٹری اوقاف نے اپنی رپورٹ
میں دربار کی ہونیوالی تزئین و آرائش پر اعتراض نہیں کیا۔
وکیل درخواست گزار نے کہا مزار کی جگہ پر دکانیں بنا کر فروخت کر دی
گئیں، اگر عدالت میری کسی درخواست کا نوٹس نہ لے تو کیا یہ میری غلطی ہوگی؟ چیف
جسٹس نے ریمارکس دئیے کہ عدالت کو ایسے کیسوں میں مداخلت سے قبل سوچنا چاہیے کہ ہم
مداخلت کرسکتے ہیں یا نہیں.؟ ہم نے مزار کے معاملہ پر مل جل کر بہتری لانی ہے۔
عدالت نے فریقین کے وکلا کا موقف سننے کے بعد چار رکنی کمیٹی تشکیل دیتے ہوئے کیس
کی سماعت کل تک ملتوی کر دی۔
No comments:
Post a Comment