پنجاب اسمبلی، معاویہ اعظم نے جھنگ کو ڈویژن بنانے کی قرارداد جمع کروا دی

 

سیاسیات- کالعدم سپاہ صحابہ کے سیاسی ونگ پاکستان راہ حق پارٹی کے رکن پنجاب اسمبلی مولانا معاویہ اعظم نے ضلع جھنگ کو ڈویژن بنانے کی قرارداد پنجاب اسمبلی میں جمع کرا دی۔ تفصیلات کے مطابق رکن پنجاب اسمبلی مولانا معاویہ اعظم طارق نے 1849 میں بننے والے ضلع جھنگ کو ڈویژن کا درجہ دلوانے کیلئے پہلی مرتبہ پنجاب اسمبلی میں قرارداد جمع کرا دی ہے۔

قرارداد میں کہا گیا ہے کہ 1849ء میں پاک و ہند میں موجود صوبہ پنجاب کے ٹوٹل 9 اضلاع تھے، جن میں ضلع جھنگ بھی موجود تھا۔ 1905 میں فیصل آباد ضلع جھنگ کی تحصیل تھی، جو عرصہ دراز سے ڈویژن ہے۔ ٹوبہ ٹیک سنگھ، چنیوٹ اور کچھ اور بھی علاقے جھنگ سے نکل کر اضلاع بن گئے، لیکن بڑوں کی عدم دلچسپی اور عدم توجہی کی وجہ سے جھنگ آج تک ڈویژن کا درجہ حاصل نہ کر سکا۔

قرارداد میں کہا گیا ہے کہ موجودہ اسمبلی کے آغاز میں حکومت پنجاب نے ہم سے وعدہ کیا تھا کہ جونہی نئے ڈویژنز کی پر پوزل آئے گی تو جھنگ کو اس میں شامل کر کے ڈویژن کا درجہ دے دیا جائے گا لیکن افسوس کہ ایسا نہیں ہوا، پنجاب میں اور ڈویژن تو بن گئے لیکن تاریخی ضلع جھنگ سے کئے گئے وعدے کو بھلا دیا گیا، جس سے عوام میں احساس محرومی پیدا ہو رہا ہے۔